ನಾಗಾಲೋಟ

ದೊಡ್ಡ ಚಿಕ್ಕ ಮುಳ್ಳಿನ
ಸತತ ತಿವಿತ ಬೆನ್ನಿಗೆ
ತಪ್ಪಿಸಿಕೊಳ್ಳುವ ಯತ್ನದಲ್ಲೇ
ಬದುಕಿನ ನಾಗಾಲೋಟ

ದಿನದ ಬ್ಯಾಸ್ಕೆಟ್ಟಿನಲ್ಲಿ
ತುರುಕುತ್ತಿದ್ದೇವೆ ಒತ್ತಿ ಒತ್ತಿ
ಬದುಕಿನ ಬಟ್ಟೆಯನು, ಉಸಿರೂ ಆಡಲಾಗದಷ್ಟು
ಒತ್ತರಿಸಿಕೊಂಡಿದೆ, ಇನ್ನೊಂದಿಷ್ಟು
ಜಾಗವಿದ್ದಿದ್ದರೆ ಮತ್ತಷ್ಟು ತುಂಬಿಸಬಹುದೇ
ಅನ್ನುವ ಚಿಂತೆ ಎಂದಿಗೂ

ಹಣ ಕೀರ್ತಿ ಆಯಸ್ಸು ಆರೋಗ್ಯ
ಎಲ್ಲಾ ಇದೆ, ಸಾಲು ಅಂಗಡಿಯಲ್ಲಿ
ಒಂದು ಬೇಕೆಂದರೆ ಇನ್ನೊಂದನ್ನು ಅಡವಿಡ
ಬೇಕು ಎನ್ನುವ ನಿಯಮವಿಟ್ಟ
ವ್ಯಾಪಾರಿ ತುಂಬಾ ಜಾಣ

ಈ ಜನಾಂಗಕ್ಕೆ ಸಮಯ ಕಮ್ಮಿ
ಯಾವುದು ಪಡೆಯಬೇಕು
ಯಾವುದು ಬಿಡಬೇಕು
ಎಂಬ ಅರಿವಾಗದ ಗೊಂದಲ
ದ ಲಗ್ಗೇಜು ಹೊತ್ತೇ
ಗೊತ್ತೇ ಇರದ, ಯಾರೂ ನಮಗಾಗಿ ಕಾಯುತ್ತಿರದ
ನಮಗೂ ಹೋಗಬೇಕೆನ್ನಿಸದ
ಕಡೆಗೆ ಅರ್ಜೆಂಟಿನ ಪಯಣ
ಅನುಪಯುಕ್ತ ಅಲೆದಾಟ
ಕಣ್ಪಟ್ಟಿ ಕಟ್ಟಿದ ಓಟ.